O vindeiro sábado 9 e domingo 10 de novembro Bodegas Martín Códax convida aos apaixonados do mundo do viño a celebrar o Día Europeo do Enoturismo cun percorrido polo vello e o novo continente, a través dunha proposta de diferentes referencias de viños brancos, chegados desde o Val do Loira, en Francia, da zona do Mosel, Alemaña, ata o val de Breedekloof, na provincia de Western Cape, ao sur de Sudáfrica, pasando pola rexión de Clare Valley, en Australia, e por California, nos Estados Unidos, ademais de degustar os albariños do val do Salnés de Martín Códax.
Os presentes serán conducidos por distintos varietais con distintas orixes e poderán comparar un mesmo varietal do novo e do vello mundo, por exemplo, poderán saborear un Sauvignon Blanc francés e un surafricano, ou un Chardonnay da rexión de Languedoc-Roussillon e un norteamericano. Así mesmo, poderán sucar o Atlántico e gozar do esplendor das Rías Baixas, grazas ás burbullas dun Espumoso Martín Códax, os sabores que achegan unha fina selección de lías a Martín Códax Lías e a particularidade que achega a botrytis nobre ás uvas sobremaduras do noso Martín Códax Gallaecia.
A actividade dará comezo ás 11:30 horas cunha breve visita á adega para coñecer máis sobre a súa historia, a súa filosofía e a elaboración dos seus produtos. Os visitantes gozarán tamén dunha demostración dunha degolación tradicional a “sabrage” do Espumoso Martín Códax e ademais dunha cata maridaxe de nove viños de catro continentes con distintos queixos traídos de Galicia, España e de diferentes partes do mundo, da man da Queixería Marqués de Valladares.
A actividade, que conta cun aforamento máximo de 30 persoas, ten un prezo de 25 euros. Os interesados en participar deben adquirir a súa entrada comprando a través da nosa páxina web.
