54 finalistas optan a facerse cun Premio Martín Códax da Música

Cada vez estamos máis cerca de coñecer quen serán os gañadores da sexta edición dos Premios Martín Códax da Música! Este mércores acollíamos en bodega a Festa de Nomeados dos premios da música en Galicia, nun evento que estivo marcado por un ambiente festivo e cheo de ledicia entre todos os finalistas.

Tras a votación de todos os socios da Asociación de Músicas ao Vivo, organizadora destes premios, foron escollidos como finalistas un total de 54 proxectos, tres por cada unha das 15 categorías e os tres Premios Organistrum. Agora a sorte queda nas mans do xurado integrado por profesionais da música de diferentes ámbitos (interpretación, industria, formación, salas e comunicación) que decidirán que artistas e grupos se farán cun Melómano na gala final que se celebrará o vindeiro 8 de maio no Pazo da Cultura en Pontevedra.

Na gala entregarase tamén o Premio Honorífico Músicas Ao Vivo ao músico estradense Carlos Barruso, “en homenaxe a un compañeiro e personalidade clave para entender a evolución da música moderna en Galicia. Un profesional impecable e xeneroso, cun talento colosal que influenciou e segue influenciando a moitas xeracións de músicas e músicos”.

Xoan Allegue, presidente da nosa bodega foi o encargado de abrir o acto cunhas palabras nas que asegurou que “é unha honra dar o noso nome a estes premios que se converten na gran festa da música galega e na oportunidade para visibilizar e recoñecer o traballo de toda a comunidade musical”, e continuou destacando que estes premios son “unha aposta na que debemos estar unidas as empresas privadas e as administración públicas, comprometidas na difusión e fomento da nosa cultura”. Allegue tamén fixo fincapé na base cooperativista da asociación Músicas ao Vivo, e ese espírito e filosofía comúns coa bodega.

Sonia Lebedynski, presidenta Músicas ao Vivo, foi a segunda en intervir. Nos seu discurso agradeceu “a implicación das músicas e músicos galegos unha vez máis nesta edición” e asegurou que “o espírito de comunidade, de sector estratéxico, de familia, de industria, de riqueza, de colectivo, emana outra vez máis nestes premios”.

Ao encontro asistiu tamén o director da Agadic, Jacobo Sutil; o delegado de Cultura da Deputación de Pontevedra, Xosé Leal; a concelleira de Cultura do Concello de Pontevedra, Carmen Fouces; a concelleira de Promoción da Cidade do Concello de Pontevedra, Anabel Gulías;a alcaldesa do Concello de Cambados, Fátima Abal; e o tenente de Alcalde do Concello de Cambados, Víctor Caamaño.

A continuación podes encontrar todos os proxectos finalistas da VI edición dos Premios Martín Códax da Música: